彩儿：你近三年发展日本房产中介生意，开咗JP Housing，做埋董事总经理。熟咗日本市场之后仲炒埋日股添喎！

李：旧年三、四月日本政府推行量宽，令日圆逐渐贬值，吸引热钱流入，所以就喺自己较熟悉嘅建设、房地产同房地产中介等板块加注投资，我只会投资自己熟悉嘅股份，而其他在港知名度较高嘅消费股，好似UNIQLO母公司Fast Retailing（日股：9983）同Sony（日股：6758）等都唔会掂。

我经常喺东京四出睇楼，几了解当地地产商建屋质素，所以主打投资质优嘅公司，例如积水房屋（日股：1928）、鹿岛建设（日股：1812），亦曾投资三井不动产（日股：8801）等日经成分股。

Kitty：之不过，日经指数一九八九年底曾高见38,957点，之后日本楼市同股市泡沫先后爆破，股市经历二十四年动盪仲未返家乡，你唔惊……

李：其实最初投资日股嗰阵都有戒心，但係当时有个喺日本证券行做嘢嘅朋友话我知，当地政府事后严控股市泡沫，而且上市要求严谨，係亚洲最健全市场之一，经深入了解先入市。我旧年投资日股嘅回报率约20%，今年年内就有10%左右。

目前日股佔资产组合约8%，有分散风险嘅作用，因为太忙，我每周只可以抽空审视同调整投资部署一至两次，主力长线投资。鑑于抱住日圆持续弱势、而日经尚有上升空间嘅预期，所以我经常用日经期指长仓对冲风险o架！

建设股回报够「靓仔」

彩儿：日本量宽政策，再加二○二○年嘅东京奥运效应，东京啲「砖头」可能会逐步升呀！

李：所以我咪更加睇好日本建设股同地产股。其中，积水房屋为我去年至今带嚟约40%累计回报，算係「爱股」，除回报靓仔之外，锺情呢隻股或者係因为以前去日本留学时住过佢起嘅楼，有情意结囉，哈哈！

Kitty：你「唔熟唔食」，一定赢开巷啦。

李：都唔係o架！之前我投资过大型发展商野村不动产（日股：3231），虽然股份旧年爆升44%，但年内就跌20%，最终平手出货，明显係功课做得唔够，忽略大市同其他因素对其影响，我从中吸取教训。

彩儿：你○三年辞工留学日本，又识日文，做功课炒日股实「Easy执」啦！

李：我习惯睇《读卖新闻》同《日经新闻》日文版。其实安倍政府政策、欧美市场，甚至中日政局等因素都会牵动日股走势，所以留意当地新闻係必做嘅功课。举例，日本政府推出针对旅客嘅新退税措施，扩大至药物及消费品等，就有机会刺激相关股份走势喇！

Kitty、彩儿